Verbeeldingsgebed Gee dit vir Jesus

Vind ‘n plek waar gemaklik kan sit en waar jy nie gesteur gaan word nie. Neem jou tyd om rustig te raak. Maak jou oë toe as dit jou help om te fokus.

Gaan in jou verbeelding na ‘n stilplek – miskien is dit ‘n veld, ‘n strand of iewers rustig waar jy veilig voel. Sien hoe Jesus voor jou staan. Sy oë is vol liefde, vriendelikheid en begrip. Hy jaag jou nie. Hy is geduldig, Hy staan daar en wag vir jou.

Sy hand is na jou uitgestrek en nooi jou om nader te kom. En terwyl jy ‘n tree na Hom toe gee, voel jy die gewig van alles wat op jou hart is. Die spanning, die hartseer, die teleurstelling, dalk selfs die dinge wat jy vir niemand vertel het nie. Maar Jesus weet reeds. Hy is nie verbaas oor enige daarvan nie.

Hoor nou hoe Hy saggies vir jou sê: “Kom na My toe, almal wat vermoeid en belas is, en Ek sal julle rus gee.” Daar is geen druk nie, net ‘n uitnodiging. Jesus staan daar met Sy hand uitgestrek, gereed om alles te vat wat jy dra – die dinge wat moeilik is, die dinge wat jou swak laat voel, die stryd wat jy voel jy nie kan afskud nie.